मर्चवार । ईलाका प्रहरी कार्यालय मझगावाको नागरिक सुनुवाई कार्यक्रम सम्पन्न भएको छ । सोमबार मझगावामा सम्पन्न नागरिक सुनुवाई कार्यक्रममा बोल्ने वक्ताहरुले प्रहरी र समुदाय बिच सहकार्यमा जोड दिएका थिए ।
कार्यक्रमका प्रमुख अतिथि एवम कोटहीमाई गाउँपालिकाका अध्यक्ष बालकृष्ण त्रिपाठीले नागरिकको शान्ती सुरक्षाको लागि प्रहरी खटाईएको हुदा उनिहरुलाई सहयोग गर्नु नागरिकको पनि दायित्व रहेको बताए । प्रहरीले कानुन कार्यान्वयनको क्रममा सुक्ष्म अध्ययन गरि निर्दोष फस्न नहुने र दोषीलाई उन्मुक्ति दिन नहुने बताए ।
समुदायमा शान्ती सुरक्षा कायम गर्न नागरिकले कानुनको पालन गर्नुको साथै आफ्नो नजिक भई रहेको वा हुन सक्ने बिभिन्न अपराधहरुबारे प्रहरीलाई जानकारी दिने दायित्व पनि रहेको बताए । उनले कानुन कार्यान्वयनको लागि कोटहीमाई गाउँपालिका प्रहरीको सहयोग गर्न सदैव तत्पर रहेको बताए ।
कार्यक्रममा बोल्दै ईलाका प्रहरी कार्यालय मझगावाका प्रमुख, प्रहरी निरिक्षक सन्तोष बस्यालले नागरिकमा सुरक्षा चेतनामा कमि भएकोले समुदाय प्रहरी समझदारी कार्यक्रम मार्फत सचेतना फैलाउने बताए । यस्तै साधन श्रोतको कमि तथा नेपाल र भारतको सीमा पनि कानुन कार्यान्वयनमा चुनौती देखिएको बस्यालले बताए । उनले नेपालमा अपराध गरि भारतमा भागेर जाने भएकोले पनि कठिनाइ भएको बताए । कार्यक्रममा प्रहरी निरिक्षक बस्यालले ईलाका प्रहरी कार्यालयले सम्पादन गरेको कामहरु बारे जानकारी गराएको थिए ।
ईलाका प्रहरी कार्यालय मझगावाका प्रमुख सन्तोष बस्यालको अध्यक्षता गाउँपालिका अध्यक्ष बालकृष्ण त्रिपाठीको प्रमुख आतिथ्यतामा सम्पन्न कार्यक्रममा गाउँपालिकाका प्रमुख प्रशासकिय अधिकृत दिनेश कुमार गौड लगायत स्थानियहरुले बोलेका थिए । कार्यक्रमको सञ्चालन प्रहरी सहायक निरिक्षक सुभास थारुले गरेका थिए ।
