भैरहवा । अख्तियार दुरुपयोग अनुसन्धान आयोगले रुपन्देहीको भैरहवास्थित मालपोत कार्यालयका एक कर्मचारीलाई दुई लाख रुपैयाँ घुससहित नियन्त्रणमा लिएको छ । अख्तियारको बुटवल कार्यालयबाट खटिएको टोलीले मालपोत कार्यालय, भैरहवामा कार्यरत नायब सुब्बा ओमबहादुर खाम्चा मगरलाई घुस रकमसहित पक्राउ गरेको हो । सेवाग्राहीको जग्गा सम्बन्धी काममा 'सर्जमिन मुचुल्का' का लागि सहजीकरण गरिदिने भन्दै उनले घुस माग गरेका थिए ।
विशेष सूचनाका आधारमा पुगेको अख्तियारको टोलीले उनलाई भैरहवा बजारबाटै रंगेहात पक्राउ गरेको स्रोतले जनाएको छ ।अख्तियार स्रोतका अनुसार, पक्राउ परेका मगरको साथबाट घुस बापतको २ लाख रुपैयाँ बरामद गरिएको छ । उनलाई नियन्त्रणमा लिएर थप अनुसन्धान प्रक्रिया अगाडि बढाइएको अख्तियारले जनाएको छ । हालैका दिनमा सरकारी कार्यालयहरूमा घुसखोरी बढेको गुनासो आएपछि अख्तियारले आफ्नो सक्रियता बढाएको छ ।
