मर्चवार, ७ माघ ।
भारतको अयोध्यास्थित नवनिर्मित भगवान राममन्दिरमा माघ ८ गते (२२ तारिख) मा हुने प्राण प्रतिष्ठाको अवसरमा सोमबार मर्चवारमा विशाल मोटरसाइकल निकालिने भएको छ ।
सोमबार (भोलि) दिउँसो साढे ११ बजे रुपन्देहीको कोटहीमाई गाउँपालिका–५ स्थित मझगावाँदेखि दुईमोहान, बेतकुइयाँ, थुम्हवा, करौता, सेमरा, अमवा, बगौली, ओडवलिया, बनियाडिहा हुँदै मर्चवारी मन्दिरसम्म र्यालीको आयोजना गरिएको संयोजक सुग्रिम यादवले बताए ।
मन्दिरमा पुगेर १ हजार ८ वटा दीप प्रज्जवलन गरी प्रसाद वितरण समेत गरिने संयोजक यादवले जानकारी दिए ।
संयोजक यादवका अनुसार शोभा यात्रामा सहभागी हुन मर्चवारका टोल टोलका युवा तथा विभिन्न संघ–संस्थाहरुलाई निमन्त्रणा गरिएको छ । ‘५ सय बढी मोटरसाइकलसहित १ हजार बढी भक्तजनहरु सहभागी हुने अपेक्षा गरेका छौं । तर, यो संख्या अझ बढ्न सक्नेछ, ’ उनले भने ।
त्यसै गरी सो अवसरमा रोइनिहवा शिव मन्दिरमा पनि १ हजार १ सय वटा दीप प्रज्ववलन गरिने स्थानीय अशोक कुमार तिवारीले बताए । ‘स्थानीयहरुको उपस्थितिमा मन्दिरको परिसर सफाई गरिएको सोमबार साँझ दीप प्रज्जवलन गरिने छ ’ तिवारीले भने ।
सम्मरीमाई गाउँपालिका–४ सिद्धेश्वर मन्दिर परिसर, सम्मरीमाई–६ महदेइयामा कलीमाई मन्दिर, कोटहीमाई–४ कोटहीमाई मन्दिर लगायत विभिन्न मठमन्दिरहरुमा सामूहिक दीप प्रज्जवलन गर्ने कार्यक्रमहरु राखिएको आयोजकले जनाएका छन् ।
